Xatosiz yozuv - xatosiz bilimga boshlaydi

Inson bosh miyasidagi hujayralar miyaning doimiy faoliyati tufayli emas, balki faoliyatsizligi oqibatida ko‘proq nobud bo‘lar ekan. Shu bois ham aqlli odamlar miya faoliyatini doim harakatlantirib, tafakkurini rivojlantiradi. Bolalarda tafakkurning rivoji o‘ta intensiv kechadi. Mana shu intensiv taraqqiyotni yanada jadallashtirish mumkin. Buning uchun bolalar bilan maxsus mashg‘ulotlar olib borilsa, ularning tafakkuri, nutqi rivojlanadi. Ayniqsa, bolalarning ijodiy fikrlashi va savodxonligini oshiruvchi topshiriqlar, psixologik, mantiqiy masalalar va turli boshqotirmalar bolalarning yozma savodxonligini oshirishning samarali usullaridan hisoblanadi. O‘quvchi bunday mashg‘ulotlarni bajarar ekan, xayolan bilimlar olamini kezib chiqadi. Qisqa va bebaho umrning eng pokiza daqiqalarini yashaydi, tafakkur qayroqtoshi bilan o‘z aqlini charxlaydi, kamolotning yangi pog‘onalariga qadam qo‘yadi.